كلمات قصيدة عناي جيت لدارك
عناي جيت لدارك
جيت اشتكي من نارك
والبعد آه من البعد
ريت السكن بجوارك
عناي جيت ابچي وأون
وبصدري هم يسحن سحن
يا دمع يازي عالوجن
ترسم خطوط انهارك
ترسملي بسمة وتختفي
وافكار عگلي تهفهفي
مثل السعف من يرجفي
يا من يجيب أخبارك
يا من يرد گلبي الي
بالعشگ غارگ مبتلي
ها يا عمامي وكل هلي
ما من شفيج اتدارك
ما من شفيج بعلتي
ولا من طبيب لبلوتي
يا ولف حن لحالتي
وٱحسبني من خطارك
وٱحسبني من أهل السبيل
وٱرحم دليلي ان جاني ليل
العرب ما تنطي الدخيل
وآني ٱحتميت جوارك
اني ومنو اني صفيت
صرت انت كلي وما دريت
يا لامتي شبيدي ارتميت
ومحد سأل شخبارك
محد يمر ينشد علي
مكسور من ضيم العلي
لك ربي شلت اثنين ايدي
وٱستسلمت لأقدارك
وٱستسلمت لله وصحت
الله من جلة/ت البخت
بالهجر حيل تمرمرت
يا گلب شوف شحالك
يا گلب مرهون الحزن
بسمك ولا يضحكلي سن
مهما يمر بيك الزمن
ما ظن جرح يبرالك
إرسال تعليق